Emisións de Gases de Efecto Invernadoiro (GEI)

Descrición breve
Avaliación das emisións de orixe antropoxénica dos principais gases que contribúen ao efecto invernadoiro. As emisións totais para estes compostos exprésanse en CO2 equivalente (CO2eq) por habitante e preséntanse en forma de índice (1990=100 para CO2, CH4, N2O e 1995=100 para gases fluorados: SF6, HFC e PFC).
O cambio climático obrigou á redución das emisións de gases de efecto invernadoiro, é dicir, descarbonización progresiva da economía, fortemente influenciada polos sistemas enerxéticos nacionais, polas estruturas industriais, agrícolas e forestais, polos sistemas de transporte, de xestión de residuos e polos patróns de consumo da poboación.
A Unión Europea no que se refire ao Protocolo de Quioto e no seu desexo de cumprir cos compromisos adquiridos (redución do 8% das emisións con respecto aos niveis de 1990 entre 2008 e 2012) está a adoptar unha serie de medidas fronte ao cambio climático que implicará unha redución do 20% das emisións de GEI como mínimo e o aumento de até o 20% da cota de Enerxías renovables no consumo de enerxía final até 2020, coñecido como o compromiso 20-20-20.

Fórmula de cálculo
(a/b)*100

Variables
a -toneladas de CO2 equivalente
b - toneladas CO2 equivalente ano 1990

Unidades
% Emisións de GEI en relación a 1990 (1990=100)

Fontes
CMATI; EEA, MARM, Eurostat

Análise breve
De acordo cos respectivos Inventarios Nacionais de Emisións de GEI, as emisións en 2009 para a eurorrexión foron de 55.120 ktonCO2eq, cerca dun 11,4% máis elevadas que as de 1990. Este número encóntrase por debaixo do valor de referencia 2008-2012, definido polo Protocolo de Quioto tanto para Portugal (27%) como para España (15%).
Até o ano 2005 existe un aumento progresivo nas emisións GEI para a eurorrexión, España e Portugal (Gráfico 20). Entre 2005 e 2009 obsérvase unha redución das emisións na eurorrexión superiores ao 19%, en Portugal as emisións reducíronse cerca dun 16,4%, mentres en España a redución foi de só o 14,7%.

Gráfico 20 — Comparación dos niveis de variación das emisións GEI en relación a 1990 (=100) (Anexo V).

Figura 10 – Comparación europea dos niveis de emisións no ano 2009 relativo a 1990 (=100).

As emisións de GEI na eurorrexión, de 2009 con respecto a 1990, sitúanse ao nivel da Irlanda (114), Grecia (117) ou Austria (102), por debaixo do índice de España (130) e de Portugal (124) (Figura 10).